Kosova përballet me Lituaninë në çerekfinale të Europianit në CS2

Ekipi i Kosovës në Counter-Strike 2 ka siguruar një sukses të jashtëzakonshëm, duke u kualifikuar në çerekfinalet e Kampionatit Europian, i cili po mbahet në sallën “1 Tetori” në Prishtinë.

Pasi triumfuan bindshëm ndaj Çekisë me rezultat 2:0 dhe arritën një përmbysje të madhe kundër Danimarkës me rezultat 2:1, Kosova e mbylli fazën e grupeve në vendin e parë, duke u renditur mes tetë skuadrave më të mira të Europës.

Në çerekfinale, Kosova do të përballet me Lituaninë, e cila e mbylli garën në grupin D në vendin e dytë. Kjo ndeshje emocionuese do të zhvillohet nesër (e shtunë) nga ora 14:30.

Gjysmëfinalet janë planifikuar të luhen po ashtu nesër, me fillim nga ora 21:30, ndërsa finalja e madhe do të zhvillohet të dielën në mbrëmje, duke kurorëzuar më të mirët e kontinentit.

Turneu po zhvillohet për herë të parë në Kosovë dhe përfaqësuesja vendëse po dëshmon një formë të shkëlqyer, me mbështetje të fuqishme nga publiku vendas.